في ذكرى معركة أبوطليح

نحنا جدودنا فرسان مابعرفوا الخوف

تاريخم مسطرفي الكتب معروف

في(أبو طليح) خيولم وقفوها صفوف

بالماضي المهند قابلوا القرنوف

**

نحنا أحفاد (غناوة و العقيد و المر)

عندنا ذكرى بين الناس فعالنا تسر

نحنا المابنجبن في المحاصة نتر

نلاقي عدونا بالهندي السنين الحر

**

من دم الغزاة أجدادنا أرووا سيوفم

ركزوا و رددوا التهليل و رصوا صفوفم

ذكروا الأطعمم من جوع و أمّن خوفم

بينين و (عزة) وكت النايبات بتشوفم

**

ليك يا (عزة) بنجود بالنفيس و الغالي

كونك لينا ذات رفعة و مكانك عالي

نيلك غرق الواطي و طمح في العالي

ملكتينا هولندي أب حليباً حالي

**

ليك يا (عزة) بنجود بي نفسنا ومالنا

كونك لحظة ذكراك ما بتغيب عن بالنا

فيك نبع الحنان و اتعاقبت أجيالنا

من خيرك غرفنا وكلنا بي مكيالنا

**

ليك يا (عزة) بالروح العزيزة نجود

كونك لينا ما اتباخلتي بالموجود

تاريخك مدوّن في الكتب موجود

طبعتينا بي عز النفس و الجود

**

نحن آآ (عزة) أمناك البنحفظ سرك

نتقاسم معاك يا (عزة) خيرك وشرك

خليتينا ننعم بي حنانك وبرك

نحمي حماك نحارب في سماك وبرك

**

أبو طليح ناسا رايج في المحامد سوقم

مهما قلنا مابنقدر نوفي حقوقم

بالسيف و الرمح سووا البدع في عوقم

هيبة و صولة ثوب العزة خايل فوقم

**

نحنا أعز من نخبة كرام منبتنا

قيمك بيها اتشربنا و اطبعنا

نحن الفوق كراسي المملكة اتربعنا

و إن كرّينا جائعات السباع تتبعنا

**

بِرك ودرك آآ عزة الوفير شبعنا

عزة نداك سمعناهو وحولك اتجمعنا

عزة وراك سرنا ولي خطاك تابعنا

عزة الجود معا اتآآخينا و اترابعنا